– BINOM мектептерінің концепциясы жасақталған кезде бұл мектептер міндетті түрде инклюзивті болуы тиіс деген шешім қабылданды. Осылайша Астанадағы алты мектебіміз бен Атыраудағы екі BINOM оқуда ерекше қажеттіліктері бар оқушылар үшін де есігін айқара ашты. Бүгін ұстаздарымыздың бөлісетін «лайфхактары» – бұл олардың мектеп ашылуынан бері, нақтырақ айтқанда, алты айда ғана жинаған тәжірибесінің көрінісі. Сол себепті қазіргі таңда біз үшін ең маңыздысы – ата-аналардың ұстаздарды риясыз қолдауы. Мен кезінде Орал қаласындағы есту және сөйлеу қабілеті бұзылған балаларға арналған облыстық мектеп-интернатының директоры қызметін атқардым. Сол кезде ана ретінде, әйел ретінде, маман ретінде түсінгенім: жағдайды мойындау керек, бірақ та мойымау керек. Мыңдаған шақырымдық жол алғашқы қадамнан басталады. Сол себепті алға ғана ұмтылуды көздеуіміз қажет. Сол жолда бір-бірімізді қолдауымыз керек, – деді шараны ашқан «Білім Болашағы» қоғамдық қорының атқарушы директоры Шолпан Қадырова.